BACAAN HARI MINGGU PRAPASKAH II (Thn A, 20 Maret 2011; Bahasa Batak Karo)

BACAAN HARI MINGGU PRAPASKAH II
(Thn A, 20 Maret 2011; Bahasa Batak Karo)
Kej 12:1-4a, Mzm 33:4-5,18-19,20,22, 2Tim 1:8b-10, Mat 17:1-9

OGEN SI PEMENA:

Pendilon Debata kempak Abraham Bapa kerina jelma si tek man Dibata.

I daerah Haran, nina Tuhan man si Abraham, 12:1 Nina TUHAN man Abram, "Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi. Nterem Kubahan sinursurndu, janah e me pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu. Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa." Kenca umur Abram 75 tahun, berkat me ia i Haran nari bagi si isuruh TUHAN.

MASMUR PENGALOI:

Reff.: Kelengi kami o Tuhan, kalak si perdosa enda.

1. Ranan TUHAN kerina tuhu, dingen kerina perbahanenNa terarapken tuhu.
Ngena ate TUHAN kebujuren dingen keadilen, keleng ateNa rasa lalap ndemi doni enda.

2. TUHAN ngkawali kalak si ngikutken Ia, kalak si ernalem man keleng ateNa si la ersibar.
IpulahiNa kalak si erkemalangen bana i bas kematen nari, dingen tetap ipegegehNa tupung i bas kelihen pe.

3. TUHAN saja sibahan pengarapenta, Ia kap si nampat dingen si kawalta.
Meriah ukurta erkiteken Ia, tek kita man gelarNa si Badia.
O TUHAN , kelengi min kami lalap, sabap kami erpengarapen man baNdu.

OGEN PEDUAKEN:

Dibata ndilo kita ras mereken kegeluhen.

Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e. Kita enggo iselamatkenNa janah enggo kita ipilihNa jadi sikerajangenNa, labo erkiteken kai si ibahan kita, tapi erkiteken sura-suraNa dingen lias ateNa nge. Lias ateNa e iberekenNa arah Kristus Jesus ope denga tembe si nasa lit enda. Tapi genduari perkuah ateNa e enggo tangkas man banta arah kerehen Si Ngkelini kita, Kristus Jesus. Jesus enggo naluken kuasa kematen janah enggo ipetangkasNa kegeluhen si la erkeri-kerin arah Berita Si Meriah

BERITA SIMERIAH:

AyoNa ersinalsal bagi terang matawari.

Enem wari kenca si e Jesus mabai Petrus, Jakup, ras sembuyakna Johanes serap ku das deleng si meganjang. I lebe-lebe kalak enda teluna, salih rupa Jesus: ayoNa ersinalsal bagi terang matawari janah uisNa mbentar erndilap-ndilap. Jenari idah ajar-ajar si telu kalak e Musa ras Elia ercakap-cakap ras Jesus. E maka nina Petrus man Jesus, "O Tuhan, senang kal iakap kami i jenda; adi mehuli iakapNdu banci kubahan i jenda telu sapo-sapo, sada man baNdu, sada man Musa, janah sada nari man Elia." Asum Petrus ngerana denga, rempet nusur embun ersinalsal ngelinggemi Jesus, Musa ras Elia. Jenari terbegi sora i bas embun e nari, "Enda me AnakKu si Kukelengi, Ia me si nehken peratenKu begikenlah Ia!" Kenca ibegi ajar-ajar sora e, nembah ia, ayona seh ku taneh, janah mbiar kal ia. Tapi ideheri Jesus ajar-ajar e, ikuitNa, jenari nina, "Tediskenlah! Ola kam mbiar!" E maka jurgak ajar-ajar e ise pe lanai idahna i je seakatan Jesus. Tupung erdalan nusur ku berneh, ngerana Jesus man ajar-ajarNa nina, "Ola iturikenndu man ise pe kerna kai si enggo idahndu ndai ope denga Anak Manusia si isuruh Dibata ipekeke i bas si mate nari."
Bagen me kata Tuhan.