WARI MINGGU PERSIKAPEN PASKA V, 10 April 2011 (Bahasa Batak Karo)

WARI MINGGU PERSIKAPEN PASKA V, 10 April 2011 (Bahasa Batak Karo)
Yeh 37:12-14, Mzm 130:1-2,3-4ab,4c-6,7-8, Rm 8:8-11, Yoh 11:1-45

OGEN SIPEMENA:

“Kubereken nge KesahKu man bandu, gelah banci kam nggeluh.”

Bagenda me kata Tuhan Dibata, “O umat manusia, ateKu nalangi kuburendu, je nari Kupekeke kam ibas kuburendu nari, janah Kutaruhekn kam ku negeri Israel. Kenca Kutalangi kuburen ingan bangsangKu ikuburken, janah Kupedarat ia i jenari, ietehna me maka Aku kap TUHAN . Kutamaken kesahKu i bas ia, maka nggeluh ia mulihi, jenari Kubere ia ringan i bas negerina jine. Kenca bage ietehna me maka Aku kap TUHAN . Aku, TUHAN enggo melasken katangKu, janah la banci lang Kusehken bagi si Kukataken e.
Bagenda me Kata si nipeseh Dibata man banta.

MASMUR PENGALO-NGALO:

Reff; Kelengi kami o Tuhan kalak siperdosa enda.

1. O TUHAN , kulebuh Kam, i bas kelbung kesusahen si mbages nari.
Dengkehken penderkuhku, o TUHAN , begiken sorangku mindo penampat.

2. Adi ateNdu ertaktak kerna dosa kami, ise banci pulah i bas ukumenNdu nari?
Tapi i bas Kam lit pengalemi dosa gelah kami malang man baNdu.

3. Kutimai penampat i bas TUHAN nari, dingen erpengarapen aku man kataNa.
Kutimai TUHAN , lebihen asangken si jaga malam nimai matawari pultak.

4. Araplah man TUHAN , o Israel, erkiteken keleng ateNa si tetap, dingen katawari pe Ia nggit engkelini.
Ia kap si nebusi bangsaNa, i bas kerina dosa-dosa nari.

OGEN SIPEDUAKEN

“Kesah Dibata si mpekeke Kristus si enggo ate e, ringan nge ibas dirinfu.”

O senina-senina, Kalak si nggeluh rikutken sura-sura ukur manusia la banci ngena ate Dibata ibahanna. Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan i bas kam. Kalak si la lit Kesah Kristus i bas ia, la ia sikerajangen Kristus. Tapi adi Kristus ringan i bas kam, maka amin arus gia kulandu mate erkiteken dosa, tendindu nggeluh kap erkiteken Dibata enggo ngerembakken kam kempak diriNa. Adi Kesah Dibata si enggo mpekeke Jesus i bas si mate nari ringan i bas kam, maka Dibata si enggo mpekeke Kristus i bas si mate nari e la banci lang mereken geluh si mbaru man kulandu si arus mate e, arah KesahNa si ringan i bas kam e.
Begen me Kata si nipeseh Dibata man banta.

BERITA SI MERIAH

“Aku kap kekeken ras kegeluhen.”

I Betani lit sikalak si penakiten gelarna Lasarus. 11:1 I Betani lit sekalak si penakiten, gelarna Lasarus. Ia turang si Maria ras Marta. (Si Maria enda me si ncurcurken minak si merim ku naheTuhan dingen si ngapusisa alu bukna.) Si Maria ras Marta erbahan berita man Jesus nina, "O Tuhan temanNdu si ikelengiNdu paksana sakit." Kenca seh berita e man Jesus nina, "Penakit enda labo erkedungen i bas kematen; tapi penakit enda jadi gelah terpuji Dibata, janah enda me jadi sada dalan gelah terpuji Anak Dibata." Si Marta, Maria ras Lasarus keleng kal ate Jesus. Tapi kenca ibegiNa pe berita kerna Lasarus sakit, la minter idahiNa; tapi lit dua wari nari dekahna Ia i bas ingan e. Kenca si dua wari e nina man ajar-ajarNa, "Ota ku Judea kita mulihken." Ngaloi ajar-ajarNa, "O Guru, mbaru denga pe ibenteri kalak Jahudi atena Kam; mulihken ka ateNdu ku jah?" Erjabap Jesus, "Ma sepuluh dua jam sada wari? Adi suari kalak erdalan labo ia tertuktuk, sabap idahna terang doni enda. Tapi adi berngi ia erdalan tertuktuk me ia, sabap la lit terang i bas ia." Bagenda me nina Jesus. Jenari tole nina, "Temanta Lasarus enggo tunduh, janah ateKu lawes guna ngingeti ia." Ngaloi ajar-ajarNa, "O Tuhan, adi enggo tunduh ia, malemna me e." Si tuhuna maksud Jesus e me Lasarus enggo mate; tapi iakap ajar-ajarNa maksud Jesus si Lasarus tunduh saja. E maka ikataken Jesus man ajar-ajarNa e alu terus terang, "Lasarus enggo mate. Tapi meriah ukurKu sabap la Aku i jah, sabap erkiteken si e banci kam tek man bangKu. Otalah si dahi ia." Jenari Tomas (si igelari Kembar) ngerana man temanna sapih ajar-ajar, "Ota ku jah kita ras Guru enda, gelah mate kita kerina ras Ia!" Kenca seh Jesus i Betani, idapetiNa enggo empat wari dekahna Lasarus ikuburken. I Jerusalem nari ku Betani la lit telu kilometer dauhna. E maka i Jerusalem nari pe nterem kalak reh ngapuli Marta ras Maria erkiteken turangna Lasarus enggo mate. Kenca ibegi Marta maka Jesus enggo reh, ndarat ia njumpai Jesus; tapi Maria tading i rumah. Nina Marta man Jesus, "O Tuhan, bicara i jenda min ndai Kam, labo mate turangku e! Tapi amin bage gia, tek nge aku maka kai pe ipindoNdu genduari man Dibata iberekenNa nge." Nina Jesus man Marta, "Nggeluh nge turangndu mulihken." Ngaloi Marta, "Kueteh nge maka i bas wari pendungi pagi keke nge Ia i bas si mate nari." Nina Jesus man Marta, "Aku kap si mereken kegeluhen ras mpekeke kalak mate. Ise tek man bangKu, nggeluh me aminna gia enggo mate. Kalak si nggeluh dingen tek man bangKu ndigan pe la mate. Tek kam katangKu e?" Erjabap Marta, "Tek aku, Tuhan! Tek aku maka Kam Anak Dibata, Si Engkelini si ipadanken Dibata enggo reh ku doni enda." Kenca bage mulihken Marta ku rumah. Ikusikkenna man Maria nina, "Enggo i jenda Guru, idiloNa kam." Kenca ibegi Maria kai si ikataken Marta, minter tedis ia jenari lawes ia njumpai Jesus. (Paksa si e Jesus langa seh i bas kuta. Ia tetap denga ibas inganNa jumpa ras Marta ndai.) Ngidah Maria rempet tedis, iakap kalak Jahudi si reh ngapuli e, lawes ate Maria ku kuburen. E maka ikutkenna Maria lawes. Kenca Maria ngidah Jesus janah kenca seh ia i bas ingan Jesus, minter ia erjimpuh i lebe-lebe Jesus, jenari nina, "O Tuhan, bicara i jenda min ndai Kam labo mate turangku e!" Asum idah Jesus si Maria tangis ras kalak Jahudi si reh ras si Maria e megogo dingen ceda ateNa. E maka isungkunNa kalak ndai nina, "I ja ia ikuburkenndu?" Erjabap kalak ndai, "Ota sinehen, Tuhan." Tangis Jesus. E maka nina kalak Jahudi, "Nehenlah, seh kal tuhu ateNa kelengna si Lasarus e!" Tapi lit ka si ngerana, "Kalak pentang ibahanNa jadi erpengidah, la kin Ia ngasup erbahanca gelah ola min ndai mate si Lasarus e?" Alu ate megogo lawes Jesus ku kuburen e; kuburen e liang si itutupi alu batu. "Gulingken batu enda!" nina Jesus. Tapi ngaloi Marta turang si mate e, "O Tuhan, enggo mbau ia, sabap enggo empat wari ikuburken!" Nina Jesus man Marta, "Ma enggo ndai Kukataken man bandu maka adi tek kam idahndu nge kuasa Dibata?" E maka igulingken kalak e batu ndai. Jenari ertoto Jesus man Dibata nina, "O Bapa, bujur Kukataken man baNdu sabap ibegikenNdu pemindonKu. Kueteh nge maka katawari pe ibegikenNdu pemindonKu, tapi si enda Kukataken guna kalak si tedis i jenda, gelah tek Ia maka Kam kap si nuruh Aku." Kenca bage, alu sora megang erlebuh Jesus nina, "O Lasarus, mari ndaratken!" E maka ndarat si enggo mate e. Tanna ras nahena ibaluti alu uis mbentar, ayona ibaluti alu uis. Jenari nina Jesus man kalak si i je, "Tangtangi balutna e, jenari pelepas ia lawes." Ngidah kejadin e nterem kalak Jahudi si reh ngapuli Maria jadi tek man Jesus.

Bagen me Berita si Meriah si nipeseh Dibata man banta.