LITURGI PERKAWINAN BAHASA TOBA

RUHUT-RUHUT
ULAON PARDONGAN SARIPEON

GEREJA 'MARIA dari GUNUNG KARMEL' TIGALINGGA
KEUSKUPAN AGUNG MEDAN

1. Panomu-nomuon

(Pastor dohot Vorhanger manang pangurus Gareja manomu rombongan ni panganten dipintu di Gereja)

Pastor :
Horas ma di hita saluhutna tarlumobi di hamu na laho manjalo pasu-pasu pardongansaripeon nuaeng. Sai anggiat ma Debata mamasu-masu hita saluhutna.
Umat : Amen.

2. Pasahathon Natarpasu-pasu (wakil ni natua-tua na tarpasu-pasu)

Orang tua :
Amang Pastor nami na pinarsangapan. Nunga marsitandaan jala nunga masihaholongan ianakhon nami on, ima si ................. dohot si ............... Ala ni i, saonari ro do hami angka natoras nasida i, pasahathon nasida tu Huria ni Jesus Kristus marhite-hite amanta pastor i, jala hupangido hami asa rade ma amanta pastor mamasu-masu nasida marguru tu angka ruhut-ruhut nang hasomalon ni huria Katolik.

Pastor :
Mauliate ma dihamu, disude haporseaon muna pasahathon nasida nadua on asa diresmihon pardongansaripeon nasida di bagasan Huria Katolik. Sai anggiat ma Debata mamasu-masu hita saluhutna tarlumobi nasida nadua on: Dibagasan goar ni Ama, dohot Anak, dohot Tondi Porbadia.

Umat : Amen.

(Pastor mamispis panganten i dohot aek nabadia)

Pastor :
Saonari dibagasan haporseaon, rap udur ma hita masuk tu bagas joro ni Debata laho mangulahon ulaon Pamasu-masuon Pardongansaripeon na badia i.

(Pastor, Vorhanger / pengurus gereja , pangantin dohot keluarga mardalan masuk tu gareja las didongani dohot Ende Pamungkaan)

3. Ende Pamungkaan

Manang

4. Tanda Silang dohot Hata Huhuasi

Pastor :
Dibagasan goar ni Ama, dohot Anak, dohot Tondi Porbadia.
Umat : Amen.

Pastor :
Hagogoon ni Tuhanta Jesus Kristus, holong ni roha ni Debata dohot parsaoran ni Tondi Porbadia ma, mandongani hamu saluhutna.
Umat : Nang hamu pe didongani Tuhan i.

Pastor :
Hamu angka dongan nahinaholongan di bagasan Tuhan Jesus Kristus, donganta si ....................... Dohot si ............................ On,saonari laho mangaresmihon pardongansaripeon ni nasida, ima di na laho manjalo pasu-pasu pardongansaripeon. Dibahen i, andorang so ta mulai ulaon na badia on, hohom ma hita satongki, mardongan haporseaon, tapasada pingkiran dohot rohanta, jala tatopoti ma dosa dohot hahuranganta asa tama jala tao hita parsidohot diulaon on, jala mangido pasu-pasu tu hita tarlumobi di donganta na dua on.

......................... (Hohom satongkin).................................

Saonari tapangido ma hasesaan ni dosa sian Tuhanta, ima rap manangianghon ma hita tangiang Hamubaon ni Roha.

Ahu marhatopothon tu Debata Nasunhinagogo, nang tu hamu pe ale angka dongan, paboa naung mardosa situtu do ahu, marhitehite pingkiran, hata, ulaon dohot lan hahurangan.
Dibahen salanghu, salanghu, salanghu na umbalga.
Dibahen i, huelek-elek Maria nabadia, na tongtong nasohabubuhan, angka surusuruan dohot angka nabadia, nang hamu pe ale angka dongan, asa ditangianghon hamu ahu tu Tuhan Debatanta i.

Pastor :
Sai marasi ni roha ma Debata na sunhinagogo i di hita, sai disesa Ibana ma angka dosanta, jala ditogu-togu ma hita tu hangoluan na tong-tong.
Umat : Amen.

5. Ale Tuhan Asi RohaM di hami (Dijahahon manang diendehon)

P. Tuhan Jesus Kristus, Ho do Hata i na sian Debata na boi paluahon hami.
Ale Tuhan asi rohaM di hami.
S. Ale Tuhan asi rohaM di hami.

P. Dipargogoi jala dipalua Ho hami sian nasa na jahat.
Ale Kristus asi rohaM di hami.
S. Ale Kristus asi rohaM di hami.

P. Diparmudu-mudu Ho do hami asa boi huhaholongi hami Debata jala
marhabasamon songon Ho sandiri.
Ale Tuhan asi rohaM di hami.
S. Ale Tuhan asi rohaM di hami.

6. Hamuliaon (ndang ingkon adong)

7. Tangiang Pamungkaan

Pastor :
Martangiang ma hita,
Ale Debata Sitompa dohot Sipalua hami, mauliate ma hupasahat hami tu Ho, ala nunga olo Ho mandongani jala mangajari hami rap dohot dongan nami si …………………… dohot si ……………………on sahat tu ombas on. Ale Tuhan, sai sesa ma sude angka dosa nami dohot angka hasalaan nami, asa tama hami ro tu joloM pasahathon hamuliateon ni roha nami jala pasangaphon mamuji goarMu, huhut mangido pasu-pasu dohot asiM tu dongan nami on. Ai Ho do paojakhon jala na mangatur ruhur ni pardongansaripeon bahen hatuaon di hajolmaon songon tanda hasadaon ni Kristus dohot huriaNa i. Sai anggiat ma marhite-hite on, lam diantusi nasida ma hahiason ni ngolu pardongansaripeon i di tingki las ni roha manang di tingki hasusaan. Sai anggiat ma dilehon Ho tu nasida angka anak dohot boru na tau palashon huhut pasonanghon roha nasida. Marhite-hite Kristus Tuhan nami.
Umat : Amen.

PARHALADOON HATA NI DEBATA

8. Panjahaon I 1Musa 2:18-24

Tatangihon ma hata ni Debata na nienet sian Buku ni si Musa:
Dungi ninna Debata Jahowa ma: Ndang jadi punjung jolma i; Hubahen ma di ibana sada pangurupina bahen donganna. Ai dung sun dijadihon Debata Jahowa sian tano i nasa binatang di ladang ro di sude pidong angka na martonga-tonga langit ditogihon mai tu si Adam, asa diida manang beha goaranna; jala ia i dibahen si Adam goar ni nasa na marhosa laos i do goarna. Jadi dibahen si Adam ma goar ni nasa pahan-pahanan ro di pidong angka na martonga-tonga langit dohot nasa na manggulmit di tano on. Alai anggo di si Adam ndang adong jumpang pangurupi bahen donganna. Dung i tarlalap modom ma si Adam dibahen Debata Jahowa, jadi dienet ma sada sian rusukna, jala dilangkophon sibuk tu pambuatanna i. Dungi dipauli Debata Jahowa rusuk na binuatna i sian si Adam, bahen boru-boru, jala ditogu ibana tu si Adam. Dung i ninna si Adam ma: On do sahali holi sian angka holiholingku, jala sibuk sian sibukku; goaron ma ibana: jolma ni baoa, ala sian baoa do ibana binuat. Dibahen i tadinghonon ni baoa do amana dohot inana mandongani
jolmana, jadi sada sibuk nasida.
Songon i ma dipangkulingi Debata hita sadari on.

Umat : Mauliate ma di Debata.

Manang

Tatangihon ma hata ni Debata na nienet sian Buku ni si Paulus tu ruas na di Efesus ( 5:2.21-33 ):
Jala parangehon hamu ma haholongon i songon Kristus i, na manghaholongi hamu jala dilehon do diriNa humongkop hita, gabe silua jala pelean bahen uap na hushus tu Debata.
Marsioloan ma hamu sian biar ni roha muna mida Kristus. Dioloi angka parompuan ma baoana be, songon pangoloi di Tuhan! Ai baoa i do ulu ni pardihutana, songon Kristus ulu ni huria i; laos Sipangolu daging i do Ibana. Alai songon pangoloion ni huria di Kristus i, songon i ma angka parompuan maradophon baoana be di na saluhutna. Hamu angka baoa, haholongi hamu ma pardihuta muna be songon Kristus, na manghaholongi huria i jala dilehon do diriNa humongkopsa; asa diparbadiai, dung diiasi marhite-hite na mandidihon aek di bagasan Hata i. Jala sangap do dipadiri di Ibana huria i, so marlindang, so marhalingking, manang marhahurangan dia pe, asa badia tahe jala so hasurahan. Songon i do patut haholongan ni angka baoa pardihutana be, songon danging na sandiri, na mangkhaholongi pardihutana, dirina do na hinaholonganna disi. Ndang dung dihosomi jolma daging na, diparmudu-mudu do jala dipainuinu, songon pambahen ni Kristus tu huria i. Ai ruas ni dagingNa do hita. “Ala ni i, tadingkonon ni halak do amana dohot inana, mangangkupi dongan saripena; jala gabe sada daging do nasida na dua i”. Tung na balga do hahomion on; alai tu Kristus dohot tu huria i huhonahon. Alai sandok ganup hamu, masihaholongi pardihutana be songon dirina, alai dihabiari parompuan i ma baoana!
Songon i ma dipangkulingi Debata hita sadari on.
Umat : Mauliate ma di Debata.

Manang

Tatangihon ma hata ni Debata na nienet sian Buku ni si Paulus tu ruas na di Kolose 3:12-16
Karena itu, sebagai orang-orang pilihan Allah yang dikuduskan dan dikasihi-Nya, kenakanlah belas kasihan, kemurahan, kerendahan hati, kelemahlembutan dan kesabaran.
Sabarlah kamu seorang terhadap yang lain, dan ampunilah seorang akan yang lain apabila yang seorang menaruh dendam terhadap yang lain, sama seperti Tuhan telah mengampuni kamu, kamu perbuat jugalah demikian. Dan di atas semuanya itu: kenakanlah kasih, sebagai pengikat yang mempersatukan dan menyempurnakan. Hendaklah damai sejahtera Kristus memerintah dalam hatimu, karena untuk itulah kamu telah dipanggil menjadi satu tubuh. Dan bersyukurlah.
Hendaklah perkataan Kristus diam dengan segala kekayaannya di antara kamu, sehingga kamu dengan segala hikmat mengajar dan menegur seorang akan yang lain dan sambil menyanyikan mazmur, dan puji-pujian dan nyanyian rohani, kamu mengucap syukur kepada Allah di dalam hatimu.

(Panjahaon na asing na boi dipangke : Rom 2:1-2.9-18; Kol 3:12-17;
1Kor 12:31-13:8)

9. Psalmen Hatopan / Ende Antar ni Panjahaon (dipillit ma ende na hombar tu si)

10. Aleluya

Pastor : Aleluya…
Umat : Aleluya….

Pastor : Naung pinadomi ni Debata, Ndang jadi sirangon ni jolma.
Umat : Aleluya…

11. Barita Nauli (19:3-6).

Tatangihon ma Barita Nauli ni Jesus Kristus na pinatomu-tomu ni si Mateus.
Di sada tingki ro ma angka Parise mangunjuni Ibana, ninna do: “Beha, na jadi do sirangkonon ni baoa jolmana, asal adong alana?” Alai ninna ma mangalusi nasida: “Ndang dung dijaha hamu haroha: Sian mulana i do ditompa Panompa i nasida baoa dohot boru-boru? Ai didok do: “Dibahen i, tadingkonon ni baoa do amana dohot inana, laho patupahon dirina tu dongan saripena, gabe sada dagingdo nasida na dua i”. Asa ndada dua be nasida, tung sada daging do. On pe, naung pinadomu ni Debata, ndang jadi siranghonon ni jolma.
Songon i ma Barita Nauli na pinatolhas tu hita sadari on.

Umat : Puji-pujian ma di Ho ale Kristus.

Manang

Tatangihon ma Barita Nauli ni Jesus Kristus na pinatomu-tomu ni si Johannes (Joh 2:1-11)
Dung i patoluarihon, adong ma na marbagas di huta Kana na diluat Galilea, jala disi ma ina ni Jesus. Alai dohot ma Jesus raphon angka siseanNa dipio tu pesta i. Jadi dung hurangan anggur nasida, ninna ina ni Jesus ma mandok Ibana: “Ndang adong anggur ni nasida!” Alai ninna Jesus ma mandok ibana: “Marhua ho tu Ahu inang? Ndang dope ro tingkingKu!” Dungi ninna inanai ma mandok angka parhobas: “Manang dia dohononNa tu hamu, bahen hamu ma!” Alai mangihuthon adat parburian ni halak Jahudi, adong ma disi onom gunsi (hudon batu), siat-siat dua ro di tolu poting. Dung i ninna Jesus ma mandok nasida: “Gohi hamu ma angka gunsi on aek!” Jala gok situtu ma dibahen. Laos didok muse tu nasida: “Tahui hamu ma sian i, dung i boan hamu ma tu induk muna!” . Jadi diboan nasida ma. Alai didai induk ni angka parhobas i ma aek i, naung gabe anggur, jala ndang diboto haroroanna, ai holan angka parhobas na manahui aek i do umbotosa, gabe dijou ma pangoli i. Jadi ninna ma mandok ibana: “Saluhut jolma mangalehon parjolo anggur na dumenggan; dung butong halak, asa dilehon na humurang. Ia ho, dipeop ho do anggur na dumenggan ro di nuaeng!” Asa i ma tanda na parjolo, na binahen ni Jesus di huta Kana na di Galilea, papatarhon hasangaponNa i, gabe porsea ma angka siseanNa di Ibana.
Songon i ma Barita Nauli na pinatolhas tu hita sadari on.
Umat : Puji-pujian ma di Ho ale Kristus.

(Panjahaon na asing na boi dipangke: Joh 10:1-11; Joh 15: 1-12)

12. Jamita

ULAON PAHOTHON PARDONGANSARIPEON

13. Penyelidikan Kanonik Singkat

Pastor :
Hamu na dua; .......................dohot ho...........................na ro tu jolo nami nuaeng, aha do na pinangido ni roha muna sian Huria ni Debata?

Calon Pangoli:
Amang pastor na hinahormatan, mardomu tu hata ni Tuhan sandiri, hami na dua nunga satahi jala sahata naeng sapanghilalaan dohot saparsitaonon saleleng hami mangolu. Jala ala ni i, saonari hupangido hami rade ni roha muna laho mangarasmihon, jala mamasu-masu hami gabe sada ripe mangihuthon adat dohot aturan ni Huria Katolik.

Pastor :
Mauliate ma disangkap muna nauli i. Alai andorang soi, manungkun ma jolo ahu tu pangula ni huria dohot angka saksi.
Hamu amang pangula ni huria na hinahormatan, hamu do wakil ni hurianta on, boha pandapot dohot parbinotoan muna taringot tu pangidoan ni si ..................... dohot si ......................on? Jala nunga tangkas diboto hamu naboi nasida on manjalo Sakramen Pardongansaripeon jala ndang adong be ambat-ambat na mardomu tu aturan nang hasomalan ni Huria Katolik?

P. Huria :
Amang pastor nami, nahinahormatan. Ahu pangula ni huria di hurianta on marhatutu pangidoan ni angka donganta on. Ala ni i, hupangido hami, asa rade roha muna mangarasmihon jala mamasu-masu pardongansaripeon nasida on mangihuthon angka aturan dohot ruhut nang hasomalan ni huria Karolik. Jala marguru tu pangantusion dohot parbinotoan nami, nunga boi nasida manjalo Sakramen Pardongansaripeon, ala nunga sahata saoloan, jala satahi nasida i di bagasan holong, jala nasida pe nunga paradehon dirina huhut ndang adong be ambat-ambat na boi mangambati pardongansaripeon nasida i. Alai nang pe songon i, dumenggan tasungkun ma jolo angka saksi dohot nasida nadua.

Pastor :
Mauliate ma di hamu amang pangula ni huria nami. Saonari manungkun majolo ahu tu angka saksi. Hamu na saksi nahinahormatan, ndang tung adong be angka ambat-ambat na boi manundati rasmihonon pardongansaripeon ni nasida on, mangihuthon angka aturan dohot ruhut nang hasomalan ni Huria Katolik na binoto muna?

Saksi :
Marguru tu pangantusion dohot parbinotoan nami, ndang adong be ambat-ambat na boi manundati rasmihonon pardongansaripeon ni nasida on.

Pastor :
Mauliate ma di hamu amang saksi.

14. Sungkun-sungkun Panangkasion
Sungkun-sungkun tu baoa.

Pastor :
Ale ..................nunga tutu situtu hamu marsangkap hamu, sian nasa rohamuna paojakhon pardongansaripeon raphon si.............................na dison nuaeng?

P.Baoa: Songon i do tutu.

Pastor :
Rade do hamu manghaholongi huhut pasangaphon dongan saripemuna on saleleng hamu mangolu?

P. Baoa: Rade do ahu.

Pastor :
rade do hamu olo naeng gabe ama na daulat maradophon angka ianakhonmuna, na naeng basabasahonon ni Debata tu hamu, laos manogu-nogu nasida gabe halak Kristen na sintong?

P. Baoa : Rade do ahu.

Sungkun-sungkun tu boru-boru

Pastor :
Ale ...............nunga tutu situtu hamu marsangkap hamu, sian nasa rohamuna paojakhon pardongansaripeon raphon si.................na dison nuaeng?

P.Baoa : Songon i do tutu.

Pastor :
Rade do hamu manghaholongi huhut pasangaphon dongan saripemuna on saleleng hamu mangolu?

P. Baoa : Rade do ahu.

Pastor :
rade do hamu olo naeng gabe ama na daulat maradophon angka ianakhonmuna, na naeng basabasahonon ni Debata tu hamu, laos manogu-nogu nasida gabe halak Kristen na sintong?

P. Baoa : Rade do ahu.

15. Mandok Mauliate, Mangido Maaf dohot Pasu-pasu tu natua-tua na be.

Pastor :
Hamu nadua, dung binahen sungkun-sungkun dohot panangkasion ahu pastor muna mangoloi pangidoan muna i. Alai andurang so huresmihon pardongansaripeon muna on, saonari hulehon ma tu hami tingki asa laho hamu tu natua-tua muna laho mandok mauliate tu sude holong ni nasida na saleleng on, mangido maaf tu sude hasalaan muna tu nasida saleleng on, jala jalo hamu ma pasu-pasu tu nasida. Jadi dihamu natua-tua ni na laho tarpasu-pasu on, andorang so diresmihon pardongansaripeon ni anak dohot boru muna on, jalo hamu ma hata mauliate ni nasida, dohot hata maaf ni nasida, paborhat hamu ma nasida mardongan pasu-pasu muna i.

16. Padan manang Janji Pardongansaripeon

Pastor :
Hamu na dua, saonari mardongan serep ni roha na ias, jala na polin, di bagasan sangkap nauli, dokhon hamu ma saonari padan pardongansaripeon muna i! Dihamu angka dongan na hinahormatan, jong-jong ma hita manghormati parpadanan ni angka donganta on!

PADAN NI BAOA :

Dijolo ni malim, di jolo ni angka saksi dohot di jolo ni sude hamu na pungu di son, ahu si ...................... manghajongjonghon di bagasan roha na tulus, jala na bulus, ia si ........................ na huririt nuaeng di son, mulai saonari nunga gabe donganhu saripe. Ahu marjanji, huhut marpadan ingkon burju ahu tu ibana, di tingki las ni roha, manang na arsak ni roha, di tingki parlabaan manang harugian, manang di tingki sitaonon pe ahu ingkon manghormati, pasangaphon, jala manghaholongi ibana saleleng ahu mangolu. Songon i ma parjanjian dohot parpadanan on hupadanhon di bagasan goar ni Debata marhitehite Buku Nabadia on.

PADAN NI BORU-BORU :

Dijolo ni malim, di jolo ni angka saksi dohot di jolo ni sude hamu na pungu di son, ahu si ....................... manghajongjonghon di bagasan roha na tulus, jala na bulus, ia si .......................... na mangaririt ahu nuaeng di son, mulai saonari nunga gabe donganhu saripe. Ahu marjanji, huhut marpadan ingkon burju ahu tu ibana, di tingki las ni roha, manang na arsak ni roha, di tingki parlabaan manang harugian, manang di tingki sitaonon pe ahu ingkon manghormati, pasangaphon, jala manghaholongi ibana saleleng ahu mangolu. Songon i ma parjanjian dohot parpadanan on hupadanhon di bagasan goar ni Debata marhitehite Buku Nabadia on.

Manang:

PADAN NI BAOA :

Ale ..................... ahu mangaririt ho nuaeng jala nunga hupillit ho gabe donganhu saripe. Ahu marjanji huhut marpadan, ingkon tong-tong burju ahu tu ho, ditingki las ni roha, manang arsak ni roha, di tingki adong na uli, manang sitaonon, dohot di tingki pangunjunan pe, saleleng ahumangolu. Songon i ma padan parjanjian on hupadanhon tu ho ale .......................di jolo ni malim, di jolo ni huria, di jolo ni angka saksi, di jolo ni natua-tuanta, di jolo ni angka tondong, dohot ale-alenta, dohot di jolo ni angka dongan na pungu nuaeng di son, di bagasan goar ni Debata marhite-hite Buku Nabadia on.

PADAN NI BORU-BORU :

Ale ........................ nunga diririt ho ahu, jala nunga hupillit ho gabe donganhu saripe. Ahu marjanji huhut marpadan, ingkon tong-tong burju ahu tu ho, ditingki las ni roha, manang arsak ni roha, di tingki adong na uli, manang sitaonon, dohot di tingki pangunjunan pe, saleleng ahu mangolu. Songon i ma padan parjanjian on hupadanhon tu ho ale .......................di jolo ni malim, di jolo ni huria, di jolo ni angka saksi, di jolo ni natua-tuanta, di jolo ni angka tondong, dohot ale-alenta, dohot di jolo ni angka dongan na pungu nuaeng di son, di bagasan goar ni Debata marhite-hite Buku Nabadia on.

16. Patoguhon Padan Pardongansaripeon

Pastor :
Di bagasan goar ni hurianta, di jolo ni angka saksi dohot di jolo ni sude na pungu di son, huparhatutu do pardongansaipeon muna on, gabe pardongan saripeon na gok, sada sakramen di bagasan Kristus. Hangoluhon hamu ma i, gabe mual ni hagogoon dohot pasu-pasu na manontong di hamuna nadua: ( + ) Dibagasan goar ni Ama, dohot Anak, dohot Tondi Porbadia.

Umat : Amen.

Pastor : Naung pinadomu ni Debata.
Umat : Ndang jadi siranghonon ni jolma.

17. Mamasu-masu Tin-tin

Pastor :
Ale Tuhan, pasu-pasu ma ( + ) angka tin-tin on, na huurasi hami di bagasan goarMu, ajarhon ma tu angka dongan na laho mamangke tin-tin on lapatan dohot tujuan ni i, bahen ma nasida hot dipadanna, tong-tong di bagasan dame , huhut tutu marsihaholongan. Marhite-hite Kristus Tuhan nami.

Umat : Amen.

(Pastor mangurasi tin-tin dohot aek nabadia)

Pastor :
Ale .................... (Baoa) pamasuk ma tin-tin on jari manis ni dongansaripemu bahen tanda burju ni roha dohot holong mu tu ibana. Di bagasan goarni Ama, dohot Anak dohot Tondi Probadia. Amen.

P. Baoa :
Ale ................(goar ni boru-boru) jalo ma tin-tin on bahen tanda burju ni rohangku dohot holongku tu ho.

Pastor :
Ale .................... (Boru-boru) pamasuk ma tin-tin on jari manis ni dongansaripemu bahen tanda burju ni roha dohot holong mu tu ibana. Di bagasan goarni Ama, dohot Anak dohot Tondi Probadia. Amen.

P. Baoa :
Ale .................... (goar ni baoa) jalo ma tin-tin on bahen tanda burju ni rohangku dohot holongku tu ho.

18. Pamasu-masuon Boras Parbue Sakti dohot Ulos

Pastor :
Hamu angka dongan, saonari martangiang ma hita asa dipasu-pasu Debata Boras dohot ulos on na laho pangkeonta laho mamasumasu penangtin.

Martangiang ma hita,
Ale Tuhan, Ama nami, jala Debata nami; Ho do mual ni nasa pasu-pasu, parhorason, hahipason dohot panggabeon. Tatap ma mardongan asi ni rohaM boras parbue sakti na patandahon pasu-pasu, parhorason, hahipason dohot panggabeon, jala ulos on, na patandahon pangaramotion dohot parlinggomanMu di hami, tarlumobi di angka dongan nami na laho mamangke ulos on. Pasu-pasu ( + ) ma boras dohot ulos on, na naeng pangke on nami laho mamasu-masu nasida nadua. Marhitehite Kristus Tuhan nami.

Umat : Amen.

19. Pasahatahon Ulos

(Piga-piga cara:
1. Molo mangadati: Pastor mangido asa parboru mangampehon Ulos Hela tu na tarpasu-pasu.
2. Molo ndang mangadati: Boi do ra Pastor mangido asa Paranak dohot parboru mangampehon Ulos Holong tu na tarpasu-pasu. Alana anggo di ulaon Huria manang di gareja ndang dos i dohot ulaon di alaman, ima ulos i ndang ulos hela, alai ulos Huria. Jadi molo tung pe ulos naung dipasu-pasu i diamehon tu abarani na tarpasu-pasu, na diampehon disi ima pasu-pasu ni Debata do, na dipataridahon ulos naung dipasu-pasu malim.
3. Manang pastor manguloshon ulos naung dipasu-pasu i tu pengantin, alai asing ma nian sian ulos hela nalaho di pangke di alaman. Jadi ulos khusus ma nian nadipatupa na marulaon )

20. Manaburhon Boras Parbue Sakti

Pastor :
Jalo ma boras Parbue Sakti naung pinasu-pasu on, na patandahon asi dohot holong ni roha ni Amanta Debata di hita saluhutna, tarlumobi di hamu nadua. Sai sahat ma tu hita tarlumobi di hamu nadua sigabe-gabe dohot sihoras-horas. Dibagasan Goar ni Ama dohot Anak dohot Tondi Porbadia.

Umat : Amen.

(Dung i, boi do natua-tua ni na tarpasu-pasu, angka saksi, dohot pangula ni huria manburhon boras tu na tarpasu-pasu)

21. Tangiang Pamasu-masuon

Pastor :
Saonari, masuk ma hita tu ulaon tangiang pamasu-masuon.
Martangiang ma hita,
Ale Debata, nunga ditompa Ho nasa na adong marhite hagogoonMu. Nunga didok Ho pardongansaripeon naung pinatoguMi ndang boi sirang be. Ale Debata, nunga diparbadiai Ho pardongansaripeon, jala nunga dibahen Ho parpadanan pardongansaripeon gabe tanda hasadaon ni Kristus dohot huriaNai. Ale Debata, sian mula nai do nunga dipadomu Ho baoa dohot boru-boru, jala dipasada Ho do nasida asa marpinompar. On ma sada pasu-pasu na so sinegaan ni dosa teanteanan jala na ndang tarbaorhon aek na sumar i. Sai tatap ma si .......................... on mardongan asi dohot holong ni rohaM, asa holong dohot dameMi tong-tong mian di ibana. Anggiat ma ibana gabe ina na burju songon angka boru-boru na badia na pinuji di bagasan Buku Nabadia i.
Hutangiangkon hami ma muse tu Ho si ......................(baoa) on , anggiat tong so marnaloja ibana mangharingkothon jala mangulahon tanggungjawabna songon ama maradophon pardijabuna dohot angka ianakhonna nang maradophon masyarakat.
Hupangido hami ma tu Ho ale Tuhan, Debata nami, anggiat ma nasida na dua on tong-tong marsihohot di bagasan haporseaon dohot di angka patikMi. Sai tong-tong ma marsada nasida di ripe nasida, jala anggiat ma tarida jala tarhilala di ngolu nasida holong na siang Ho i, huhut marsinondang di nasida hatioron ni bohiM, asa boi parange nasida gabe tiruan na denggan manang na di dia pe nasida. Pargogoi ma nasida marhite hagogoon ni Barita Nauli i, asa boi nasida gabe sitindangi ni Kristus tu sude dongan.
Anggiat ma marpinompar nasida, jala boi gabe natua-tua sitiruon jala sai boi ma nasida sahat marnida pahompu na tau pasonanghon roha nasida.
Anggiat ma saurmatua nasida jala di ujungna boi marhatuaon nasida di ngolu na manontong di harajaonMi. Marhite-hite Kristus, Tuhan nami.

(Ulos na diampehon tu pengantin nunga boi dilipat jala ditiop panaru manang natua-tua ni nasida)

22. Pahothon dohot Patandahaon Penangtin i tu natorop:

Pastor :
Hamu sude angka dongan na hinahormatan. Hamu sude hupadiri jala hurajumi gabe sitindangi ni parpadanan pardongan saripeon ni donganta si nn.......... dohot si nn......... on. Nunga dipadaomu jala dipasada Debata nasida na dua on di bagasan Sakramen Pardongansaripeon i. Ba sai dipasupasu Amanata Debata ma nasida, songon didok ompunta sijol-jolo tubu i ma dohonon:

Balintang ma pagabe, tumandanghon si tadoan.
Ba ari nasida nung agabe ala nunga manjalao Sakramen Pardongasaripeon jala nunga marsipaoloan.

Asa Margogo nasida pajungjunghon sadsa ripe na denggan, na tongtong sahar saroha, satahi, satolop di saluhutna, songon na nidok ni ampunta sijolo-jolo tubu ma dohonon:
Sai marongkap ma nasida songon mata ni bagot,
marsimbar songon ambalang.
Jala sai marsigomgoman ma tondi nasida tu ana tama,
tumpahon ni ompunta Debata.

Jala sai marhite-hite hasadaon ni nasida di saluhutna i, tongtong ma tiur langka nasida di ngolu on,songon na nidok ni ampunta sijolo-jolo tubu ma dohonon:
Sai tiur ma dalan boluson, tio ma aek dapoton.
Jala tio ma panggabean dohot parhorasan.

22. Tangiang Hatopan

Pastor :
Hamu angka dongan! Nunga manjalo sakramen pardongansaripeon angka donganta on di jolo ni Debata, di jolo ni Hurianta, di jolo ni hita angka na mandongani langka nasida tu garejanta on. Tatangiangkon ma nasida nuaeng anggiat tong sonang nasida di bagasan pangaramotion ni Amanta Debata.

Patugas :
Tatangiangkon ma nasida anggiat margogo mangaramoti Pardongansaripeonna di bagasan holong ni roha dohot dame, asa marsinondang sian ripenasida holong dohot lambok ni roha ni Kristus. Jala tatangiangkon ma nasida asa margogo nasida paojakhon sada rumatangga na marojahon di ugama, anggiat marisi habonaron, hakristenon jabu nasida, bahen sangap di Debata jala tau tiruan na denggan di angka donganna.
Martangiang ma hita:

Umat : Tangihon ma, Tuhan tangiang nami.

Patugas :
Tatangiangkon ma nasida asa marparbue holong ni roha nasida na pinasu-pasu ni Tuhan i, anggiat tubu di nasida anak dohot boru, na tau palashon roha nasida, dohot pahompu, na naeng pasonangkon nasida dung matua. Jala tatangiangkon ma nasida asa tong-tong hipas jala tolap mangulahon angka tohonan na ampe tu nasida, anggiat gabe na niula ni tangan nasida jala tongtong tiur langka nasida i.
Martangiang ma hita:

Umat : Tangihon ma, Tuhan tangiang nami.

Patugas :
Tatangiangkon ma nasida asa tarbahen nasida muse manogu-nogu angka anakhonna mangihuthon lomo ni roha ni Debata mardongan hapistaran dohot lambok ni roha, asa daulat jala burju, bahen pangapulon dohot las ni roha ni nasida. Jala tapangido ma sian Debata, asa sabam jala margogo nasida di tingki sitaonon, pangunjunan, arsak ni roha jala tolap manaon laos manaluhon sude na borat na olo ro tu ganup jolma jala tu ganup ripe.
Martangiang ma hita:

Umat : Tangihon ma, Tuhan tangiang nami.

Patugas :
Tapangido ma di nasida pangapulon, habengeton, hagogoon, na ringkot saleleng ngolu on, anggiat tong-tong dioloi nasida sude lomo ni roha ni Debata na mamboan hatuaon na manontong.
Martangiang ma hita:

Umat : Tangihon ma, Tuhan tangiang nami.

Pastor :
Ale Debata, ramoti ma angka dongan nami on di bagasan holong ni rohaMi, asa Ho ma manungkoli jala mangurupi nasida saleleng di ngolu nasida; jala boan ma nasida sogot tu hasonangan na manontong, i ma hatuaon nami, sahat ro di saleleng ni lelengna.

Umat : Amen.

** Molo kedua Pengantin sama-sama Katolik, ulaon ditorushon di bagasan Misa Nabadia. Lanjutma tu halaman 20 :

23. Ende jala Pasahathon Silua / Pelean Parjolo

24. Tangiang Ama nami.

Pastor :
Dihamu angka dongan na hinholongan, saonari tapasada ma sude tangiang puji-pujian, pelean dohot pangidoanta di bagasan tangiang na niajarhon ni Jesus Kristus sandiri:

Umat :
Amanami na di banua ginjang, sai pinorbadia ma goarMu, sai ro ma harajaonMu, sai saut ma lomoM di banua tonga on, songon na di banua ginjang. Lehon ma tu hami sadari on, sipanganon nami siganup ari. Jala sesa ma salanami, songon panesa nami di sala ni angka parsala tu hami. Dung i unang togihon hami tu pangunjunan. Alai palua ma hami sian pangago.

25. Embolisme

Pastor :
Ale Amang, pinasangap ma goarMu, diangka ulaon dohot parsaoran nami si ganup ari, di tonga ni rumatangga dohot masyarakat nami. Urupi ma hami asa tong-tong nunut marusaha pature-turehon ngolu nami gabe puji-pujian di goarMu, huhut manghirim di haroro ni Jesus Kristus, Sipalua hami.

Umat :
Ai Ho do nampuna harajaon, dohot hagogoon, dohot hasangapon, ro di saleleng ni lelengna.

Pastor : Dame ni Tuhanta Jesus Kristus ma mandongani hamu saluhutna.

Umat : Saonari ro di saleleng ni lelengna. Amen.

ULAON PANUTUP

25. Mamasu-masu Buku Nabadia dohot Silang (Molo adong)

Pastor :
Martangiang ma hita,
Ale Tuhan Debata nami, pasu-pasu ma Buku Nabadia on (+) na laho dipangke dongan nami si ............... dohot si ................. on, asa hata ni Debata na tarsurat di bagasan Buku Nabadia on gabe tungkot dohot sulu di keluarga ni nasida. Suang songon io, pasu-pasu ma Silang on (+), asa gabe tanda diharoroM di keluarga ni nasida, jala mangalehon gogo tu nasida laho mangaradoti patikMi. Marhite Kristus Tuhan nami.

Umat : Amen.

26. Tangiang Panutup
Pastor :
Martangiang ma hita,
Ale Tuhan, tatap ma angka dongan nami on, na pinungka nasida di joloM dohot di jolo ni langgatanMi, sai diulahon jala diradoti nasida ma i mardongan hagogoon ni pasu-pasuM. Antong, patimbul ma hasangapon ni goarMu di bagasan pardongansaripeon ni nasida on, bahen tiruan di hami, na tau puji-pujian di Ho, nuaeng dohot ro di saleleng ni lelengna.

Umat : Amen.

27. Martangiang tu Bunda Maria (Molo diulahon)

Pastor :
Hamu angka dongan, keluarga na imbaru on laho martangiang marhite Maria Ina Nabadia, mangido tangiangna asa ditangiangkon keluarga ni nasida anggiat boi songon ripe nabadia na di Nasaret i.

(Pangantin laho ma tu jolo ni patung Bunda Maria, pagalap lilin jala rap martangiang nasida. Tangianna boi ma di ida di halaman .Tingki on, boi do diiringi dohot lagu Maria)

28. Manengken Berkas-Berkas Perkawinan

(Pengantin dohot angka saksi manengken angka berkas-berkas perkawinan.)

29. Merende jala Pasahathon Kolekte Paduahon

30. Pasu-Pasu Parujungan

36. Pasu-Pasu Parujungan

Pastor :
Sai marsinondang ma hatiuron ni bohi ni Debata di si …… dohot si ……on nang dihita sude, sai dipatuduhon Ibana ma hinadenggan ni rohaNa, jala sai dilehon ma dame na manontong i tu hita sude.

Umat : Amen.

Pastor :
Sai anggiat ma Amanta Debata patuduhon holong ni rohaNa, jala patoguhon parale-aleonta. Sai anggiat ma Debata Anak, mangalehon dameNa jala patuduhon pangaramotionNa tu si ………… dohot si………… nang tu hita sude.

Umat : Amen.

Pastor :
Sai anggiat ma Debata Tondi Porbadia mangusehon las ni rohaNa, jala manogu-nogu si ……….. dohot si …………. on, nang tu hita sude.

Umat : Amen.

Pastor :
Sai anggiat ma hita sude, tarlumobi si …………… dohot si ……….. on, ditogu-togu, dilinggomi, huhut diramoti pasu-pasu ni Debata hita saluhuta.

Umat : Amen.

Pastor : Tuhani mandongani hamuna.

Umat : Nang hamu pe didongani Tuhani.

Pastor :
Hamu angka dongan na hinaholongan, anggo ulaon pamasu-pasuon pardongansaripeon ni donganta na dua on nunga sae be. Mardame ma hita mulak manorushon ulaonta mardongan pasupasu dohot holong ni Debata.

Umat : Mauliate ma di Debata.

Pastor :
Debata Nasunhinagogo i ma mamasumasu hita, Ama, dohot Anak, dohot Tondi Porbadia.
Umat : Nang hamu pe didongani Tuhani.

31. Hata Panutup :
Mandok Hata, Marfoto, Marende huhut manjalang mempelai dohot hasuhuton paranak dohot parboru.

KDS :
Hamu angka dongan nahinaholongan, anggo ulaon huria nunga sun be. Saonari
pinasahat ma tingki mandok hata sian paranak dohot parboru, rap jongjong ma nasida di jolo. Dung sidung i, marfoto ma jolo kedua penangtin dohot pastor di jolo. Na mangihut, marende hita annon huhut manjalang penangtin dohot natoras paranak nang parboru. Parjolo ma natoras paranak dohot parboru manjalang pengantin, dungi ro ma natorop manjalang sian hambirang tu siamun ni gareja on. Songoni ma, mauliate.

32. Ende Panutup

(bereng hita di lembaran terakhir)

LITURGI EKARISTI

(Molo dibagasan Misa Nabadia)

23. Ende jala Pasahathon Silua / Pelean

24. Tangiang Pasahathon Pelean

Pastor :
Martangiang ma hamu, angka dongan, anggiat dihalomohon Debata peleanta on.

Umat :
Sai dijalo Tuhan i ma peleanta on sian tangan muna, bahen hasangapon dohot hamuliaon di goarNa, huhut bahen hatuaon di hita dohot di sandok HuriaNa na badia i.

Pastor :
Ale Debata, jalo ma pelean on na husombahon hami saonari tu Ho; marhite sian i hupangido hami; suksukhon ma pasu-pasuM di pardongansaripeon on; ai Ho do mangadongkon ruhut na badia on. Antong, ramoti jala ondingi ma angka dongan nami on marhite-hite holong ni roha ni AnakMu Jesus Kristus na so marbatas, na mangolu nuaeng dohot tongtong ro di saleleng ni lelengna.

Umat : Amen.

25. Prefasi

Pastor : Tuhan i ma mandongani hamu na.
Umat : Nang hamu pe didongani Tuhan i.

Pastor : Dompak ginjang ma rohanta.
Umat : Nunga tapahehe rohanta dompak Tuhan i.

Pastor : Mandok mauliate ma hita, tu Tuhan Debatanta.
Umat : Patut jala tama do i.

Pastor :
Ima tutu, na tama jala patut, tigor jala uli do, asa tongtong jala manang di dia pemandok mauliate hami tu Ho, ale Tuhan, Ama Nabadia, Debata nasunhinagogo jala na manontong, i ma marhite-hite Kristus Tuhan nami. Ai marhite Ibana do ditogu-togu Ho hajolmaon tu hatuaon i; di bagasan Ibana do diadongkon Sakramen Pardongansaripeon gabe pardomuan ni holong, asa patar holong ni rohana mida oroanna, i ma Huria i; sude anak na tubu sian pardongansaripeon naung pinasu-pasuMidipabangkit Ho do gabe anakMu, sitean angka parsaulian sogot, dongan panean ni Kristus.
Marhite Ibana dipuji angka suru-suruan dohot angka Nabadia hatongamonMu; dibahen i, loas ma hami padomuhon soara namitu endenasida i, asa dohot hami tong-tong marserep ni roha manghatindangkon:

Umat :
Nabadia, Nabadia, Nabadia do Tuhan
Debata sigomgom hasiangaon.
Gok hamuliaon do angka langit dohot tano on.
Hosanna ma na di ginjang. Pinasupasu ma na ro,
di bagasan goar ni Tuhan i.
Hosanna ma na di ginjang.

26. Tangiang Bolon II

Pastor :
Tung Nabadia do Ho, ale Amang, mual ni nasa habadiaon.
Antong hupangido hami,
parbadiai ma siluanami on marhite gogo ni TondiM.
Asa muba di hami gabe Daging (+) dohot mudar ni Tuhannami Jesus Kristus.
Di borngin uju dipasahat Ibana, paima so songgop sitaonon na bernit, na jinaloNa sian rade ni rohan, dibuat Ibana ma roti, didok ma mauliate, diponggoli ma roti i, diparlehon tu angka siseanNa, huhut mandok:

JALO HAMU JALA PANGAN HAMU MA: AI ON DO DAGINGHU, NA PINASAHAT HUMOPHOP HAMI.

Songon i muse dung sidung mangan, dibuat Jesus ma panginuman. Didok muse mauliate, dipasahat ma i tu angka siseanNa huhut mandok:

JALO HAMU, SUDE MA HAMU MINUM SIAN ON!
ON MA PANGINUMAN NA MARISI MUDARHU, MUDAR PARPADANAN NI PADAN NAIMBARU JALA NA MANONGTONG, NA NIUSEHON HUMOPHOP HAMU DOHOT NATOROP BAHEN HASESAAN DOSA.
SONGON I MA ULAHON HAMU BAHEN PARNINGOTAN DI AHU.

Pastor :
Antong huhut marningot hamamate dohot haheheon ni Kristus, husombahon hami do tu Ho ale Amang roti hangoluan dohot panginuman haluaon on. Mandok mauliate do hami, ala nunga dipatama Ho hami jongjong tu adopanMu, laho marhalado di joloM. Hupangido hami, asa hami naung manjalo dagong dohot mudar ni Kristus dipasada Tondi Porbadia i gabe bangsoM.
Palua ma nang angka dongan nami, angka n a porsea dohot sude tahe angka naung monding i. Sai lehon ma tu nasida dohot sude dongan naung mate di bagasan Kristus paradianan na sonang. Sai asi ma rohaM tu nasida, janghon ma nasida tu bagasan ampuanMu.
Ale Amang, sude do hami mangido asi ni rohaM, asa dohot hami marjambar di hatuaon na manongtong, raphon santa Maria, nasohabubuhan, ina ni Debata, raphon angka apostel dohot sude halak nabadia, an tong mangolu di bagasan holongMu. Sai loas ma hami dohot mamuji pasangaphon Ho.

Pastor :
Marhite-hite Ibana rap dohot Ibana laos di bagasan Ibana, tong-tong do sahat tu Ho ale Tuhan Debata Ama na sunhinagogo, di bagasan hasadaon ni Tondi Porbadia, nasa somba dohot hamuliaon, sahat ro di saleleng ni lelengna.

Umat : Amen.

27. Tangiang Ama nami.

Pastor :
Tuhan i do mandasdas hita marhite hataNa, laos mangajari hita marhite sian panuturion ni hadebataonNa. Ido alana umbahen na barane hita mandong/ mangendehon.

Umat :
Amanami na di banua ginjang, sai pinorbadia ma goarMu, sai ro ma harajaonMu, sai saut ma lomoM di banua tonga on, songon na di banua ginjang. Lehon ma tu hami sadari on, sipanganon nami siganup ari. Jala sesa ma salanami, songon panesa nami di sala ni angka parsala tu hami. Dung i unang togihon hami tu pangunjunan. Alai palua ma hami sian pangago.

28. Embolisme

Pastor :
Ale Amang, pinasangap ma goarMu, diangka ulaon dohot parsaoran nami si ganup ari, di tonga ni rumatangga dohot masyarakat nami. Urupi ma hami asa tong-tong nunut marusaha pature-turehon ngolu nami gabe puji-pujian di goarMu, huhut manghirim di haroro ni Jesus Kristus, Sipalua hami.

Umat :
Ai Ho do nampuna harajaon, dohot hagogoon, dohot hasangapon, ro di saleleng ni lelengna.

Pastor :
Dame ni Tuhanta Jesus Kristus ma mandongani hamu saluhutna.

Umat :
Saonari ro di saleleng ni lelengna. Amen.

29. Anak Biru-Biru

Umat :
Anak biru-biru ni Debata, na mambuat dosa ni portibi on,
Asi rohaM di hami.
Anak biru-biru ni Debata, na mambuat dosa ni portibi on,
Asi rohaM di hami.
Anak biru-biru ni Debata, na mambuat dosa ni portibi on,
Lehon ma dame di hami.

30. Komuni

Pastor :
Hamu angka dongan, ida ma Anak biru-biru ni Debata na mambuat dosa ni portibi on. Martua ma hita na niarahon tu haroro ni biru-biru i.

Umat :
Ale Tuhan, na so tama do ahu manjangkon Ho, alai dok ma hataM sandok sambing, jadi ias ma ahu naposoMon.

(Pangantin manjalo Komuni dua rupa)

ULAON PANUTUP

31. Mamasu-masu Buku Nabadia dohot Silang (Molo adong)

Pastor :
Martangiang ma hita,
Ale Tuhan Debata nami, pasu-pasu ma Buku Nabadia on (+) na laho dipangke dongan nami si ............ dohot si .................on, asa hata ni Debata na tarsurat di bagasan Buku Nabadia on gabe tungkot dohot sulu di keluarga ni nasida. Suang songon io, pasu-pasu ma Silang on (+), asa gabe tanda diharoroM di keluarga ni nasida, jala mangalehon gogo tu nasida laho mangaradoti patikMi.
Marhite Kristus Tuhan nami.

Umat : Amen.

32. Tangiang Panutup
Pastor :
Martangiang ma hita,
Ale Tuhan, tatap ma angka dongan nami on, na pinungka nasida di joloM dohot di jolo ni langgatanMi, sai diulahon jala diradoti nasida ma i mardongan hagogoon ni pasu-pasuM. Antong, patimbul ma hasangapon ni goarMu di bagasan pardongansaripeon ni nasida on, bahen tiruan di hami, na tau puji-pujian di Ho, nuaeng dohot ro di saleleng ni lelengna.

Umat : Amen.

33. Martangiang tu Bunda Maria

Pastor :
Hamu angka dongan, keluarga na imbaru on laho martangiang marhite Maria Ina Nabadia, mangido tangiangna asa ditangiangkon keluarga ni nasida anggiat boi songon ripe nabadia na di Nasaret i.

(Pangantin laho ma tu jolo ni patung Bunda Maria, pagalap lilin jala rap martangiang nasida. Tingki on, boi do diiringi dohot lagu Maria)

TANGIANG MANGIDO TANGIANG SIAN MARIA NABADIA

Maria ina nami nabadia, ida ma hami nadua na marlasroha nuaeng on, ai ndang tardok hami balga ni las ni roha nami dohot balgani hamuliateon nami di sude pasu-pasu naung hujalo hami, tarlumobi di panogu-noguon ni Tuhan Debata naung pasadahon hami.
Maria ina nami, huboto hami do, on holan mula ni ngolu na ingkon sidalanon nami dope. Husadari hami do, ima ganjang nai dope pardalanan ngolu ni keluarga nami. Di jolo nami, godang nai ambat-ambat, parungkilon dohot angka parsoalan na olo mangambati habagiaon di keluarga nami. Dibahen i, hupagido hami tu ho ale Maria nabadia, togu-togu jala ajari ma hami laho patupahon ripe songon ripe na di Nasaret na marisi habengeton, dame, holong dohot sada ni roha. Paingot ma hami molo hurang malo, hurang mangantusi, jala hurang sabar. Anju jala elek-elek ma hami molo hansit ni roha dohot parmaraan mangonai tu hami. Patogu ma rohanami, molo arsak ni roha, harugian dohot sitaonon ni ngolu mangonai tu hami. Togu-togu ma hami di na laho mangajari ianakhon nami, asa gabe anak na burju, tarlumobi asa gabe anak na mangoloi di hatani anakMu Jesus Kristus i.
Ale Maria nabadia ina nami, sai anggiat ma holong naung pasadahon hami, tong-tong mian di ngolu nami dohot di ripe nami, asa haduan hami boi rap marlas ni roha di harajaon ni Tuhanta Jesus Kristus. Amen.

Tangiang Tabi Maria 3 hali

Tabi di Maria na gok asi, didongani Tuhan i do ho.
Ho do na pinasupasu sian angka boru-boru,
jala pinasu-pasu do parbue ni bortianmu, Jesus.
O Maria nabadia, ina ni Debata, tangianghon ma hami pardosa on,
nuaeng dohot tingki hamamate nami. Amen.

(Dungi pengantin mulak tu inganna muse)

34. Manengken Berkas-Berkas Perkawinan

(Pengantin dohot angka saksi manngken angka berkas-berkas perkawinan.)

35. Merende jala Pasahathon Kolekte Paduahon

36. Pasu-Pasu Parujungan

Pastor :
Sai marsinondang ma hatiuron ni bohi ni Debata di si …… dohot si ……on nang dihita sude, sai dipatuduhon Ibana ma hinadenggan ni rohaNa, jala sai dilehon ma dame na manontong i tu hita sude.

Umat : Amen.

Pastor :
Sai anggiat ma Amanta Debata patuduhon holong ni rohaNa, jala patoguhon parale-aleonta. Sai anggiat ma Debata Anak, mangalehon dameNa jala patuduhon pangaramotionNa tu si ........ dohot si......... nang tu hita sude.

Umat : Amen.

Pastor :
Sai anggiat ma Debata Tondi Porbadia mangusehon las ni rohaNa, jala manogu-nogu si ......... dohot si ........ on, nang tu hita sude.

Umat : Amen.

Pastor :
Sai anggiat ma hita sude, tarlumobi si .......... dohot si ................ on, ditogu-togu, dilinggomi, huhut diramoti pasu-pasu ni Debata hita saluhuta.

Umat : Amen.

Pastor : Tuhani mandongani hamuna.

Umat : Nang hamu pe didongani Tuhani.

Pastor :
Hamu angka dongan na hinaholongan, anggo ulaon pamasu-pasuon pardongansaripeon ni donganta na dua on nunga sae be. Mardame ma hita mulak manorushon ulaonta mardongan pasupasu dohot holong ni Debata.

Umat : Mauliate ma di Debata.

Pastor :
Debata Nasunhinagogo i ma mamasumasu hita, Ama, dohot Anak, dohot Tondi Porbadia.

Umat : Nang hamu pe didongani Tuhani.

37. Hata Panutup :
Mandok Hata, Marfoto, Marende huhut manjalang mempelai dohot hasuhuton paranak dohot parboru.

KDS : Hamu angka dongan nahinaholongan, anggo ulaon huria nunga sun be.
Saonari pinasahat ma tingki mandok hata sian paranak dohot parboru, rap jongjong ma nasida di jolo. Dung sidung i, marfoto ma jolo kedua penangtin dohot pastor di jolo. Na mangihut, marende hita annon huhut manjalang penangtin dohot natoras paranak nang parboru. Parjolo ma natoras paranak dohot parboru manjalang pengantin, dungi ro ma natorop manjalang sian hambirang tu siamun ni gareja on. Songoni ma, mauliate.